صحينى شكرا

MeNNa · 26 - 7 - 2010, 4:33 PM

بتحب النوم ؟؟؟؟؟؟؟

نومك تقيل؟؟؟؟؟

بيبقى نفسك تصلي الفجر لكن النوم بيغلبك ؟؟؟

وجربت تظبط المنبه علشان يرن يصحيك

لكن بتصحى تقفله وتنام تاني

ولما بتقوم الصبح بتبقى مقهور وندمان إنك ضيعت صلاة الفجر

ولما بيجيلك ميل يقولك إن صلاة الفجر بتشتكي من قلة المصلين بتحس إن الكلام موجه لك وبتبقى مكسووووووووف من ربنا

طيب أنا هقولك عن الفكرة اللي طبقناها أنا ومجموعة من زملائي هي فكرة قديمة وناس كثير بتطبقها من زمان ،بس احنا عدلنا فيها شوية والحمد لله بتجيب نتيجة كويسة ولحد دلوقتي ناجحة بنسبة 90 % وبفضل الله مع الوقتهتنجح مع كل الناس

الفكرة بإختصار إننا لقينا في وسط كل مجموعة واحد بيلتزم بصلاة الفجر كل يوم وربنا ميسر له الحال وبيصحى من غير مساعدات خارجية وحواليه ناس ثانية نفسها تصلي بس مش بتقدر تصحى وفشلت

فاتفقنا إننا هنستفيد من الشخص اللي بيصحى من غير مساعدات ده إنه يصحى فرد واحد مننا
هيفضل يرن عليه ولما يكنسل هيفهم كده إنه صحى

لحد كده دي الفكرة القديمة اللي ناس كثير بتطبقها واللي احنا لقناها مش بتنفع مع كل الناس لأن في ناس بتكنسل وتكمل نوم
فلقينا إننا لو الزمنا الشخص ده إنه بعد ما يكنسل يجي دوره هو كمان يصحى واحد غيره وغيره هيصحي غيره وهكذا

هيكون عنده مجموعة أسباب تخليه بعد ما يكنسل يصحى فعلا ويصلي
السبب الأول :إنه هيكون عارف إن في شخص تاني معتمد عليه والشخص ده وراه شخص غيره معتمد عليه وسلسلة طويلة معتمدة على بعض لو فاتها صلاة الفجر هيكون هو السبب لأن الخلل كان من عنده

السبب التاني : لما يكون عارف انه لو صحي وصلى هياخد ثواب صلاته وهياخد كمان ثواب كل الناس اللي صحيت و صلت بسببه دا حافز كبير يخليه يستمر
ثالث حاجة بقى احنا عاملين عقاب للي مش هيصحى وبالتالي مش هيصحي اللي بعده " طبعا اللي بعده هو اللي هيجي يفتن عليه "
هندفعه جنية هنحطه في الحصالة " الحصالة دي كل واحد فينا ببحط فيها كل يوم جنية علشان تكون صدقة يومية بنعمل بها اعمال خيرية ودي فكرة بننفذها مع بعض من مدة ومستمرة الحمد لله"
وغير انه هيدفع الجنية كل الناس هتعرف انه هو الوحيد اللي ما صحيش وده هيخليه يتكسف من نفسه ويغير من الباقي ويحرص المرة اللي بعدها على الصلاة
طبعا الشيطان بيطور خططه مع افكارنا الجديدة ففي ناس هتلاقي نفسها بتصحى على الرن فعلا بس الشيطان هيلعب في دماغها يقولها ترن على اللي بعدها وتنام وأهوعلى الأقل هتاخذ ثواب اللي هيصلوا بعدها

طب اللي هيحصل معاه كده يعمل أيه ؟؟ لازم يفكر إن الموضوع لو استمر كده هيبقى حجة عليه أمام الله مش له وممكن ينطبق عليه قول الله تعالى
"أَتَأْمُرُونَ النَّاسَ بِالْبِرِّ وَتَنْسَوْنَ أَنْفُسَكُمْ وَأَنْتُمْ تَتْلُونَ الْكِتَابَ ۚ أَفَلَا تَعْقِلُونَ وَاسْتَعِينُوا بِالصَّبْرِ وَالصَّلَاةِ ۚ وَإِنَّهَا لَكَبِيرَةٌ إِلَّا عَلَى الْخَاشِعِينَ "

ولو كل واحد فينا خللى الآية دي قدام عينيه ربنا هيعينه ويغلب شيطانه

والواحد لو نايم فعلا وحاطط في دماغه إنه ناوي يصلي ربنا بيكرمه ومع الوقت والإصرار بيغلب شيطانة ويتعود على الصلاة ولو اتعود عليها مش هيسبها بإذن الله بعد ما يحس ببركتها

نتكلم بقى على بركتها

1– لو حافظت عليها وعلى صلاة العصر مش هتدخل النار علشان الرسول عليه أفضل الصلاة والسلام قال:« لن يلج النار أحد صلى قبل طلوع الشمس و قبل غروبها »

وهتدخل الجنة كمان بإذن الله

قال رسول الله صلى الله عليه وسلم:«من صلى البردين دخل الجنة»

2- لو صليت الصبح هتبقى في حفظ الله وأمانته

قال رسول الله صلى الله عليه وسلم:«من صلى الصبح فهو في ذمة الله»

3- ولو صليته في جماعة هتاخذ ثواب قيام اللي كله

قال رسول الله صلى الله عليه وسلم :«من صلى العشاء في جماعة كأنما قام نصف ليلة ، و من صلى الصبح في جماعة فكأنما صلى الليل كله»

4- ركعتا الفجر اللي هم ركعتين السنة اللي قبل ركعتين الصبح خير من الدنيا وما فيها، تخيل بقى صلاة الصبح نفسها هيبقى فضلها ايه

قال رسول الله صلى الله عليه وسلم:«ركعتا الفجر خير من الدنيا وما فيها»

5- صلاة الفجر بتشهدها الملائكة

(أَقِمِ الصَّلَاةَ لِدُلُوكِ الشَّمْسِ إِلَىٰ غَسَقِ اللَّيْلِ وَقُرْآنَ الْفَجْرِ ۖ إِنَّ قُرْآنَ الْفَجْرِ كَانَ مَشْهُودًا)[ الاسراء:78 [

وقرآن الفجر هو صلاة الفجر اللي بتشهدها الملائكة , والرسول عليه أفضل الصلاة والسلام قال« يتعاقبون فيكم ملائكة بالليل وملائكة بالنهار ، ويجتمعون في صلاة العصر وصلاة الفجر ، ثم يعرج الذين باتوا فيكم ، فيسألهم ، وهو أعلم بكم ، فيقول : كيف تركتم عبادي ؟ فيقولون : تركناهم وهم يصلون ، وأتيناهم وهم يصلون »

يعني هتنول شرف سؤال رب العالمين عنك وشهادة الملائكة في حقك كمان يا سيدي
طيب نفترض الكلام اللي فوق ده كله ما جابش معاك نتيجة اعذرني بقى هضطر أخوفك شوية

الرسول عليه الصلاة والسلام وصف اللي بيتهاون في صلاتي الفجر والعشاء بإنه منافق وقال « إن أثقل صلاة على المنافقين صلاة العشاء وصلاة الفجر ولو يعلمون ما فيهما (يعني من ثواب) لأتوهما ولو حبوا (أي زحفا على الأقدام) ، ولقد هممت أن آمر بالصلاة فتقام . ثم آمر رجلا فيصلي بالناس . ثم انطلق معي برجال معهم حزم من حطب ، إلى قوم لا يشهدون الصلاة ، فأحرق عليهم بيوتهم بالنار »

هاه تحب ينطبق عليك الكلام ده ؟؟؟؟

من فضلك لو ماكنتش بتصلي الفجر انوي إنك تصلي

ودور لك على صحبة صالحة تنفذ معاها الفكرة وتشجعوا بعض

ولو كنت بتصلي وتعرف ناس مش بتصلي أعرض عليهم الفكرة و شجعهم وخد بإيديهم

واللي شايف إن الفكرة تستحق النشر ينشرها

المصدر: منتديات هاى حب - من قسم: منتديات اسلامية