حبــــ story ــــــــــlove ــــــــيبتى بحبك اوى

[لميس]

اوى , بحبك , حبــــ , story , ــــــــيبتى , ــــــــــlove

حبــــ story ــــــــــlove ــــــــيبتى بحبك اوى

عارفه ليه بدوخ وانا معاكي

لأن كل نفس بيخرج مني بتدخلي مكانه انتي لحد ما تخلص أنفاسي

وأدوخ من حبك والغريبة إني بفضل أدوخ لحد ما يموتني حبك




عارفه : أنا خلاص مش قادر أفتح عنيا

لأن آخر حاجة حضنتها قبل ما تغمض هي صورتك

بحس وأنا معاكي إن البرد أجمل شئ في الدنيا

لأني بحتاج دفا وانتي الدفا وأنا بحب احتياجي ليكي

وبحب قلقك وانتي بتسألي ” بتحبني “

لأني ف لحظة سؤالك بدوب في حبك

ببقى نفسي أحضن قلقك وأضمك لقلبي عشان تعرفي بنفسك أد ايه قلبي بيحبك .

حتصدقيني لو قلتلك إني بحب كل تفصيلة صغيرة فيكي

مسكتك لفنجان الشاي وهو في حضن ايدك

القلم الرصاص اللي بتعقدي بيه شعرك

بحة صوتك وانتي لسه صاحية لما بفاجئك بتلفون الصبح

شعرك وهو نازل على وشك مسافر بيحكي قصة حب قلبي بس اللي بيعرف يقرى خطوطها ويسرح في تفاصيلها

ده أنا حتى بحب لبسك لأنه عليكي بيبقى مِنكِ , زيي كده من يوم ما عرفتك وأنا حاسسني مِنك

بحبك وببشوف جمالك بيكبر على ايديا زي طفل صغير بحس انه حته مني , ايوه متستغربيش بحسك حته مني أو أنا حته منك لحد ما بقيت أحس بغربة لو ثانيه بعدت عنك

ولما بنسيب بعض بعد اللقا بحسني رحت معاكي ورجعت ب… بلاقيني مرجعتش , دايما بنساني في شنطة حنانك وانتي بتكوني عارفه اني نستني عندك وبتمشي من غير ما تقولي عشان ارجع تاني أكلمك وأخدني منك ويا رتني بقدر أخدني منك

حتصدقيني لو قلتلك إني مبشفش أي حاجة غيرك وانا معاكي

لا بشوف الطريق ولا العربيات ولا البنات ولا الشباب ومبعرفش أنا رحت فين وجيت منين غير إني غرقت في عينيكي واتلقاني قلبك

حتصدقيني لو قلتلك إن أي مكان بتيجي فيه بحسه بيتلون بالورد

والنهار والجمال لحد ما بقيت أعشق كل الأماكن اللي شفتك فيها

وشربنا فيها فنجان حب سوا وبعشق الدوار اللي بيضني قلبي لما بيضم نبضك وبعشق سماعة التلفون اللي حضنت صوتك والورق اللي باس ايديكي وانتي بتكتبيلي وحشتك

حتصدقيني لو قلتلك إني لأول مرة في عمري أخش انام وأنا فرحان ببكره لأني حشوفك فيه

إنتي عارفه اني مبقتش أشيل هم أي مشكلة تحصلي ولا ازعل على أي حاجة بخسرها لأني حرجع في آخر اليوم اضمك وانسى همومي في حضنك

انتي عارفه إني أول مره في حياتي أحس إني بحب كل الناس اللي بيحبوني واللي مش بيحبوني وأغرقهم حب لأنك ملتيني حب وبقيت بدل ما باخد من الناس بدي

ياااه تصوري أنا حبيت الكتابة عشان بكتبلك

عشان تمسكي كراستي وتغرق في عيونك وبعدين تخطفني عنيكي وهي بتسألني بأحلي نظره حب وكسوف وفرحة ” الكتابه دي ليا أنا يا عيسى ” وقلبي يوجعني واقول أيوه أيوه يا قلبي يا روح قلبي عيسى مكنش عيسى قبلك ولا حتى بعدك

قبلك مكنش فيه حياة وبعدك بقيتك انتي ومبقتش عارف فيني منك

انتي يمكن بتقلقي ساعات لما بغيب عليكي بكلام يطمن قلبك وانا عمري كله بقى خوف وقلق ثانيه تعدي من غيرك

حد يدخل الجنة ويقدر يرجع لحظة للنار

حد يقدر يدخل قلبك ويعرف يعيش ثانيه بره نبضك

عايزاني اقول بحبك

حتصدقيني لو قلتك إن نفسي بيتقطع لو فكرت ف لحظة قد ايه بحبك واني بكتبها عشان اقدر اقولها وعشان متقلقيش عليا لو قلتها قدامك وتعبت منها لأني حقيقي بيقتلني قلقك

عارفه : بعشق طفولتك وأضم حلم لقيته فيكي ولما بتعب تكوني أمي وانام في حضنك غرقان حنان

عارفة بحب ابتسامتك وفرحة عنيكي لما نتقابل ونقع في عنين بعض دوبنا الاشتياق ونسند بعض عشان نقف واقولك وحشتيني وتقولي وحشتك ونرجع نقع تاني وتتبعتر اشواقنا في عيونا

عارفه : أوقات كتير ببقى نفسي اقولك بحبك

وعمري ما عرفت اقولها زي ما انا حاسسها ولا عمري حعرف

عشان كده برجوكي وحياة أغلى حاجة عندك حسيها جوايا انتي

حسيها وارحميني من انتحاري على الورق عشان اعرف مرة أقول بحبك

المصدر: منتديات هاى حب - من قسم: شعر - خواطر 2023 - وزن القافية

[دعاء الجنه]

تسلم الاياااااااااااااااااااااااااااااادى

[ĚĜŘĂɱ]

مشكووووووره والله يعطيكى الف عافيه
تسلم الايادى على الكلمات يا لموسه

[loodli]

[رامى المصرى]

[El5aDaSh]

بجد والله العظيم تسلم الايادى اللى تعبت فى كتابت الموضوع المهم دة وانا استفدت جدا من المعلومات دى والله ربنا يحفظك ويخليك يا قمر ودايما كدا فى تألق واستمرار ومنتظرين المزيد من الابداع الادبى والكتابى واختيار المواضيع المهمه والمفيدة والشيقه