منتديات هاى حب - أمتي أخر مره الناس ضحكت عليك.. ونعمل إيه ف المواقف المحرجة.؟

أمتي أخر مره الناس ضحكت عليك.. ونعمل إيه ف المواقف المحرجة.؟

كل واحد فينا أكيد في وقت ما أتعرض لموقف محرج جدا مع ناس مايعرفهمش .. تفتكر أخر مره حصل لك فيها كده ؟.

أسوأ موقف ممكن يتعرض له أي واحد كبير .. انه يقع .. يتكعبل في أي حفره أو طوبه ويقع بطوله كده علي ركبه أو وشه ويتفرفط في الأرض كل حته فيه تروح في ناحية .. صح ؟ أو يكون نازل أو طالع سلم ويتزحلق عليه ويقع .. والناس تتفرج بقي علي الطويل ده لما وقع .. طبعا مافيش حد حايتريق بصوت عالي لكن أكيد بيضحكوا في سرهم ويمكن يفضلوا يضحكوا لحد ما يروحوا البيت .. قال يعني مابيحصلش لهم كده .

طيب أنت عندك الشجاعة الكافية انك تحكي لحد المواقف المحرجة دي .

من الموقف المحرجة برضه انك تيجي تسلم علي حد تلاقيه مد أيده يسلم علي حد تاني من غير قصد طبعا .

أو انك تيجي تشرب حاجه تقلبها علي نفسك . أو تيجي يوم الفرح تسقي عروستك أو هي تسقيك الشربات – مش عارفه إيه الموضوع البايخ ده قال يعني حايسقوا بعض الشهد يبقوا يقابلوني – واحد فيكم يوقعها علي التاني مش كفاية توتر الفرح وفرجه الناس عليهم لا كمان ويشربوا بعض شربات لا وإيه احمر يعني بقعه عبقرية مش طالعه ولا بالطبل البلدي. أنا اعرف ناس اتطلقت في ساعتها عشان كده .

ومن الحاجات المحرجة انك تكون طالع ميكروباس وراسك تخبط في السقف مع انك بتركب أم الميكروباس عشر مرات في اليوم وأصبح جسمك اتوماتيكي يعرف ارتفاع السقف لكن تقول إيه ساعة القدر بيعمي البصر وغالبا رد فعل الواحد اللي بيتخبط ساعتها لا شعوريا انه يقول صارخا " اااااااااااااه " ورد فعل الناس أنها تضحك . عادي .

إيه تاني ؟ أه انك تكون شايل شيله تقيله في كيس خفيف ويتقطع منك في شارع زحمه أو علي سلم أتوبيس وتجري والناس وراك يلملموا لك الحاجات اللي وقعت منك .يعني تشغل نص الشعب معاك عشان شويه بصل ولا برتقال .

أو لما الموبايل يرن في الجامع وأنت بتصلي طيب هو لازم تاخده معاك خلاص يعني مش قادرين يستغنوا عنك لمده ربع ساعة . ويا عيني بقي لو الرنة لهيفا بوس الواوا .

أو لو وأنت ماشي كده في أمان الله وفجأتن جزمتك أتقطعت خصوصا لو أنت شاريها من المحلات الشعبية علي قد فلوسك .

أما بقي اكبر موقف محرج لو الهدوم أتقطعت . ساعتها بقي تقعد تستلف دبابيس ولا فتله وابره وتبقي مش عارف تداري روحك من الكسوف .

أو لو جيت تشتري حاجه وطلعت فلوسك اقل من المطلوب ساعتها تبقي عايز ترجعها وصاحب الحاجة يبص لك من فوق لتحت و ناقص يشتمك ويقعد يقطمك بالكلام .

أو لو اتصلت بحد صاحبك وغلست عليه وبعدين طلعت النمرة غلط .

أو لو جيت تعاكس واحده طلعت قريبتك أو تبقي مصيبة لو طلعت خطيبتك . دي بقي فيها ضرب .

إيه رأيك .. كام موقف من دول أتعرضت له .

أما ردود فعل الناس فهي بتختلف حسب السن والحالة النفسية يعني فيه واحد يحصل له موقف من دول ويقوم مكشر ومايبصش لحد ويكمل طريقه عادي .. وفيه اللي يضحك علي نفسه وياخد الأمور ببساطه ممكن توصل لحد الهبل .. وفيه واحد يصعب عليه حاله ويقف مطرحة مش عارف يعمل إيه .. بس أحسن حاجه في المواقف دي انك تضحك .. تطلع كل الهم والكسوف اللي جواك وتضحك .. وخلاص.